سی پیک کے تحت تمام منصوبوں کو مقررہ وقت میں مکمل کیا جائیگا،ایاز صادق

0

سی پیک کے تحت تمام منصوبوں کو مقررہ وقت میں مکمل کیا جائیگا‘منصوبہ د ونوں ملکوں کے علاوہ خطے کیلئے بھی فائدہ مند ثابت ہو گا‘چین پاکستان کا آزمودہ دوست ہے جس پر ہمیں فخر ہے۔سپیکر قومی اسمبلی سردار ایاز صادق کی اپنے چینی ہم منصب سے بات چیت

اسپیکر قومی اسمبلی سردار ایاز صادق نے اپنے چینی ہم منصب زینگ دیجیانگ سے بیجنگ میں ملاقات ۔ دونوں قائدین نے اس امر کا اعادہ کیا کہ چین پاکستان اقتصادی راہداری منصوبہ کے زیر تحت تمام پروجیکٹس کو مقررہ وقت میں مکمل کیا جائے گا۔ انہوں نے اس منصوبے کو دونوں ملکوں کے علاوہ خطے کے باقی ماندہ علاقوں کے لیے بھی فائدہ مند منصوبہ قرار دیا۔

اسپیکر سردار ایاز صادق نے کہا کہ چین ایک عظیم ملک ہے اور پاکستان کا آزمودہ دوست ہے۔ ہمیں اس بات پر فخر ہے کہ یہ تعلق اور رشتہ گزشتہ کئی نسلوں پر محیط ہے ۔انہوں نے امید ظاہر کی کہ دونوں ملکوں کو قریب لانے کے لیے متواتر پارلیمانی وفود کا تبادلہ اور باہمی عوامی روابط سے کئی دہائیوں سے جاری تاریخی تعلق داری مزید مضبوط ہوگی۔

انہوں نے چین پاکستان اقتصادی راہداری اور پاک چین تعلقات میں پاکستان کی سیاسی قوتوں کی ہم آہنگی کو بھی اجاگر کیا۔ سردار ایاز صادق نے اپنے چینی ہم منصب کو مقبوضہ وادی کشمیر میں انسانیت سوز سلوک کے بارے میں بھی آگاہ کیا اور اس امر پر زور دیا کہ طویل عرصہ سے جاری اس مسئلہ کو پر امن طریقے سے اقوام متحدہ کے قراردوں اور کشمیری عوام کی امنگوں کے عین مطابق حل کیا جائے۔

 زینگ دیجیانگ نے پاک چین دوستی کو “سدا بہار سٹریٹجک شراکت دار”قرار دیتے ہوئے کہا کہ چین پاکستان کی ترقی کے لیے ہر ممکن مدد جاری رکھے گا۔

انہوں نے مقبوضہ کشمیر کے حوالے سے پاکستان کی موجودہ پوزیشن پر اعتماد کا اظہار کیا ۔ دونوں طرف سے پارلیمانی وفود کے تبادلوں اور سی پیک منصوبہ پر پارلیمانی نگرانی کو وقت کی ضرورت قرار دیتے ہوئے کہا کہ اس سے نہ صرف دوستی کے رشتے مضبوط ہونگے بلکہ دونوں ملکوں کے متعدد شعبوں میں ترقی آئے گی۔

بعد ازاں اسپیکر سردار ایاز صادق نے وائس چیئرپرسن سٹینڈنگ کمیٹی نیشنل پیپلز کانگریس Madam Shen Yueyue کی جانب سے ان کے اعزاز میں دیے گئے عشایہ میں بھی شرکت کی۔

Share.

About Author

Leave A Reply